Azərbaycan, Bakı, 28 sentyabr /Trend, müxbir İ.Xəlilova/
"BVF-nin yaradılması haqqında" sazişin IV maddəsi üzrə məsləhətləşmələrin aparılması məqsədilə Beynəlxaql Valyuta Fondunun (BVF) missiyası oktyabrın 20-dən noyabrın 2-dək Azərbaycanda olacaq. Bu barədə Trend-ə çərşənbə günü Azərbaycan hökumətindən məlumat verilib. Məsləhətləşmələr hər il aparılır.
BVF-nin ölkə üzrə missiyasına fondun Yaxın Şərq və Orta Asiya Departamentində şöbə rəhbərinin müavini Nadim İlahi rəhbərlik edir.
"Səfər zamanı IV maddənin porioritet istiqamətləri ilə yanaşı, ölkədəki makroiqtisadi vəziyyət (cari vəziyyət və perspektivlər), valyuta fondunun texniki yardımının alınması üçün istiqamətlərin müzakirə edilməsi planlaşdırılır", - hökumətdən deyiblər.
Habelə səfər zamanı əməkdaşlığın müxtəlif aspektlərinə, o cümlədən, daha çevik məzənnə siyasətinə keçid üçün ölkənin Mərkəzi Bankı tərəfindən istənilən texniki yardım çərçivəsindəki məsələlərə də toxunulacaq. BVF hesab edir ki, bu proses inflyasiyanın hədəflənməsi sisteminə keçidlə əlaqədar iqtisadi siyasət ölçülərinin daha sıx əlaqələndirilməsi, eləcə də bank sisteminin mübadilə məzənnəsi risqlərinin öhdəsindən gəlmək qabiliyyətinin genişləndirilməsi ilə müşayiət olunmalıdır.
Azərbaycan hökuməti artıq altı ildir IV maddə çərçivəsində məsləhətləşmələr səviyyəsində BVF ilə əməkdaşlıq həyata keçirir. Ona görə də səfər zamanı proqram əsasında əməkdaşlığın perspektivlərinə praktiki olaraq toxunulmur.
Hazırda ölkənin fonddan borc alınmasını bərpa etməsi üçün səbəb yoxdur. Belə ki, Azərbaycan qlobal maliyyə böhranı şəraitində belə yardım üçün BVF-yə müraciət etməyib. Bununla əlaqədar, BVF 2009-cu ildə fondun Azərbaycandakı nümayəndəliyinin başçısını geri çağırmaq və ofisin ölkədəki ştatını ixtisara salmaq barədə qərar qəbul edib. BVF-nin Bakı ofisi Mərkəzi Asiya və Qafqaz üzrə regional nümayəndəlik tərəfindən idarə olunur.
Fond Azərbaycandakı nümayəndəlik üzrə xərclərin azaldılması haqqında qərarı onunla əsaslandırır ki, Azərbaycanın fondun kredit resurslarına ehtiyacı yoxdur, çünki ölkənin ödəniş balansında kifayət qədər böyük müsbət saldo mövcuddur. Ona görə də fondun qənaət olunmuş vəsaitləri bu gün BVF-dən iri məbləğdə kreditlər alan ölkələrə göndərilir. Hazırda Azərbaycanda BVF-nin ofisi fəaliyyət göstərir.
BVF-nin Azərbaycandakı daimi nümayəndəliyi 1993-cü ildən fəaliyyət göstərir, hökumətlə əməkdaşlığa isə 1992-ci ildən başlanılıb. Beynəlxalq təşkilat ölkəni 1995-ci ildən kreditləşdirməyə başlayıb. Bu günədək BVF respublikaya altı proqram çərçivəsində kredit ayırıb. Azərbaycan 2013-cü ilədək əvvəllər fonddan götürülən kreditlərin ödənilməsini davam etdirəcək.