Azərbaycan, Bakı, 7 oktyabr /Trend, müxbir E.İsmayılov/
Azərbaycan Dövlət Xəzər Dəniz Gəmiçiliyi (ADXDG) Rusiya Federasiyası ərazisindəki kanallarda naviqasiya mövsümünün sonuna qədər Xorvatiyanın "Ulyanik" zavodu ilə müqavilə çərçivəsində iki yeni bərə almaq niyyətindədir. Trend-in məlumatına görə, bu barədə cümə günü Azərbaycanın dövlət müstəqilliyinin 20 illiyinə həsr olunmuş tədbirdə ADXDG-nin rəhbəri Aydın Bəşirov bildirib.
"Yeni bərələr Bakıya gələn ilin noyabr ayına qədər gəlməlidir", - Bəşirov deyib.
Onun sözlərinə görə, bu il ADXDG artıq iki bərə alıb.
Bəşirov qeyd edib ki, avtomobillərin daşınması üçün yeni Bakı-Aktau marşrutunun açılması ilə əlaqədar hazırda bərələrlə yükdaşıma həcminin artdığı müşahidə olunur.
"Hazırda bu marşrut üzrə "Qara Qarayev" gəmisi işləyir, yaxın vaxtlarda isə Qara dənizdən ro-ro tipli "Fikrət Əmirov" gəmisi Bakıya gələcək. Bu, TRASECA nəqliyyat dəhlizi çərçivəsində yeni yaranmış xəttin möhkəmləndirilməsi və yükdaşıma həcminin artırılması məqsədilə edilir", - gəmiçiliyin rəhbəri bildirib.
Onun sözlərinə, 2002-ci ildən etibarən ADXDG bir yeni yük gəmisi, iki səkkiz minlik, yeddi 13 minlik və bir 12 minlik tanker alıb.
"ADXDG il ərzində təxminən 13 milyon ton həcmində yükdaşıma həyata keçirir. Xəzərsahili ölkələrdə özlərinin gəmiçiliyinin yaranması ilə başlanan rəqabət şərtlərinə baxmayaraq, ADXDG öz liderlik mövqeyini qorumaq üçün bütün lazımi tədbirləri həyata keçirir", - Bəşirov bildirib.
...