Azərbaycan, Bakı, 12 oktyabr /Trend/
"Azərikimya" İB-nin konfrans zalında Birliyin rəhbərliyi və qurumun Həmkarlar İttifaqı Komitəsi arasında Kollektiv müqavilənin müzakirəsi ilə bağlı konfrans keçirilmişdir.
Birliyin bütün müəssisələrindən olan nümayəndələrin iştirak etdiyi tədbiri Həmkarlar İttifaqı Komitəsinin sədri Vaqif Ömərov açaraq, "Azərikimya"nın ARDNŞ-in tərkibinə verilməsindən ötən il yarım ərzində istehsalat və əmək şəraitinin yaxşılaşdırılması, Kimyaçıların əməyinin mühafizəsi, onların sosial-mədəni problem və qayğılarının həlli istiqamətində görülmüş işlər barədə geniş məlumat vermişdir. Qeyd edilmişdir ki, ötən müddət ərzində insan amilinə xüsusi əhəmiyyət verən ARDNŞ rəhbərliyinin "Azərikimya"nın kollektivinə göstərdiyi diqqət və qayğı sayəsində Birliyin bir çox istehsalat və sexlərində işçilərin sağlamlığı üçün zərərli olan istehsalat sahələri ləğv edilmiş, istismar baxımından əlverişli olmayan, fiziki və mənəvi cəhətdən köhnəlmiş avadanlıqlar yeniləri ilə əvəz edilmiş, bir çox inzibati binalar və istehsalat sahələri əsaslı və cari təmir olunmuşdur.
Xüsusilə qeyd olunmuşdur ki, 5 mindən artıq əməkçinin çalışdığı Birlikdə hazırda hər bir kimyaçı fərdi iş geyimləri və mühafizə vasitələri ilə təmin olunmuşdur. Əməkçilərin orta aylıq maaşı artırılmış, onların hər birinin iş zamanı sağlam qidalanması və gündəlik yemək xərclərinin Birlik tərəfindən ödənişi təmin edilmişdir. Kimyaçıların işə rahat və vaxtında gedib-gəlmələri üçün müasir avtobusların alınması da əməkçilərə göstərilən diqqət və qayğının təzahürüdür.
Hər bir işçinin əməyinin və sağlamlığının mühafizəsini mühüm bir vəzifə kimi qarşıya qoymuş Birlik rəhbərliyi və Həmkarlar İttifaqı Komitəsi iş yerlərinin və işçilərin ciddi və yüksək tələbkarlıqla attestasiyasının keçirilməsinə nail olmuş, sex və istehsalat sahələrində əməyin mühafizəsi və texniki təhlükəsizlik qaydalarına tam riayət olunması məqsədilə iş yerlərində təlimatlar aparılmışdır.
Kimyaçılar arasında idmanın kütləviliyinin artırılması və onların mədəni istirahətinin təşkilinə də Birlikdə xüsusi diqqət yetirilir. Son dövrlərdə "Kimyaçı" Mədəniyyət sarayında görkəmli yazıçılar və aktyorlarla keçirilmiş görüşlər, sumqayıtlı gənclərdən ibarət "Sumqayıt" (hazırda "Sumqayıtşəhər") futbol klubunun yaradılması, müəssisələrdə və kimyaçıların daha çox məskunlaşdığı məhəllə və mikrorayonlarda basketbol, voleybol və futbol oyunlarının keçirilməsi üçün müasir idman avadanlıqları ilə təmin olunmuş yeni idman meydançalarının salınması, idmanın müxtəlif növləri üzrə vaxtaşırı birinciliklərin və spartakiadaların keçirilməsi də kimyaçılara göstərilən diqqət və qayğının təzahürüdür.
Tədbirin sonunda konfrans nümayəndələrinin təklif və iradları da nəzərə alınmaqla bütünlüklə qəbul olunmuş Kollektiv müqavilə "Azərikimya" İB rəhbərliyi və Həmkarlar İttifaqı Komitəsi tərəfindən imzalanaraq təsdiq edilmişdir.