...

Gəncə, Sumqayıt və Lənkəranın baş planları ilin sonuna hazır olacaq

Biznes və iqtisadiyyat xəbərləri Materials 19 Oktyabr 2011 18:03 (UTC +04:00)

Trend-i buradan izləyin

Azərbaycan, Bakı, 19 oktyabr /Trend, müxbir A.Axundov/

Gəncə, Sumqayıt və Lənkəranın baş planları ilin sonuna hazır olacaq. Bu barədə çərşənbə günü Trend-ə Dövlət Şəhərsalma və Arxitektura Komitəsinin Beynəlxaql əlaqələr və informasiya şöbəsinin müdiri Cahangir Qocayev bildirib.

"İndi bu planlar üzərində iş aparılır və ilin sonuna hazır olacaq", - Qocayev deyib.

Onun sözlərinə görə, həmin sənədlər bu şəhərlərin icra hakimiyyətlərinə təsdiqlənməyə göndəriləcək.

Hazırda Komitə artıq Bakının mərkəzinin ətraflı planlaşdırılması layihəsi üzərində işləri tamamlayır və "Böyük Bakının regional inkişaf planı" layihəsinin hazırlanması üzərində işləri başa çatdırıb. Hər iki plan 2030-cu ilədək olan dövrü əhatə edir.

Bir müddət əvvəl Azərbaycanın Dövlət Şəhərsalma və Arxitektura Komitəsinin sədr müavini Dövlətxan Dövlətxanov bildirib ki, Komitə ilin sonunadək layihəni rəsmi olaraq şəhər İcra Hakimiyyətinin başçısına təqdim edə biləcək.

Onun sözlərinə görə, plan "Amay" ticarət mərkəzindən Dövlət Bayrağı Meydanına qədər üfüqi, Dənizkənarı parkdan Bakıxanov küçəsinə qədər isə şaquli istiqamətlərdə 1500 hektara qədər ərazini əhatə edir.

"Biz Nəqliyyat Nazirliyi ilə nəqliyyatın intelektual idarə olunması sisteminin tətbiqi məsələsində sıx əməkdaşlıq edirik, ona görə də layihəni nazirliyə də təqdim etmişik", - Dövlətxanov bildirib.

O deyib ki, Dövlət Şəhərsalma və Arxitektura Komitəsi "2030-cu ilədək Böyük Bakının inkişaf planı" layihəsi üzrə işləri gələn ilin ortalarına qədər yekunlaşdırmağı planlaşdırır.

"Gələn ilin ortalarına biz Böyük Bakının inkişaf konsepsiyasını müəyyən edəcəyik, sonra isə layihənin razılaşdırılmasına başlanacaq. Gələn ilin sonuna qədər isə layihə təsdiq olunmaq üçün Nazirlər Kabinetinə təqdim olunacaq", - Dövlətxanov deyib.

"Böyük Bakıdan danışarkən, biz Bakının 11 rayonunu, Sumqayıt və Xırdalanla birlikdə Abşeron rayonunu nəzərdə tuturuq. Bu, təqribən 250 min hektar təşkil edir, halbuki 10 milyon əhalisi olan Moskva 106 min hektar ərazini əhatə edir", - sədr müavini bildirib.

Xəbər lenti

Xəbər lenti