Azərbaycan, Bakı, 21 oktyabr /Trend, müxbir N.İsmayılova/
Azərbaycandakı qızıl istehsalçısı "Anglo Asian Mining Plc" şirkəti 2011-ci ilin üçüncü rübündə əsas kreditoru Azərbaycan Beynəlxalq Bankına (ABB) iki milyon dollar ödəyib. Trend-in məlumatına görə, bu barədə cümə günü şirkətin rəsmi saytında yerləşdirilən məlumatda deyilir.
Sentyabrın 30-na olan məlumata əsasən, şirkətin ABB qarşısındakı borcu 15 milyon dollar təşkil edir. Şirkət həmçinin "Anglo Asian"ın icraçı direktoru Rza Vəziriyə 0,2 milyon dollar dəyərində borcunu ödəyib. Bununla da kredit üzrə qalıq hazırda 0,8 milyon dollar təşkil edir.
"Anglo Asian"ın icraçı direktoru qarşısındakı 0,8 milyon dollar borc daxil olmaqla, şirkətin sentyabrın 30-na olan ümumi borcu 15,8 milyon manatdır. 2011-ci il iyunun 30-na isə bu rəqəm 16,6 milyon dollar olub.
Şirkət 2011-ci ilin birinci rübü ərzində ABB-yə 8,6 milyon dollar, ikinci rüb ərzində isə 4 milyon dollar ödəyib.
Vəzirinin Trend-ə dediyinə görə, şirkət ABB-yə olan kredit üzrə ödəniş qrafikini qabaqlayır və borcunu 2012-ci ilin əvvəlinə qədər ödəməyi planlaşdırır.
Onun sözlərinə görə, şirkətin Vəzirinin özünün qarşısındakı borcu istənilən vaxt ödənilə bilər. Lakin burada nəzərə almaq lazımdır ki, bu borc üzrə faiz dərəcəsi aşağıdır. Ancaq əvvəlcə ABB krediti üzrə ödənişlər həyata keçiriləcək.
"Anglo Asian Mining Plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlüdə işləmək hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
