Azərbaycan, Bakı, 3 noyabr /Trend, müxbir İ.Xəlilova/
Azərbaycan Vergilər Nazirliyində "Nəqliyyatın intellektual idarə edilməsi Mərkəzi " MMC dövlət qeydiyyatından keçib. Bu barədə cümə axşamı nazirliyin rəsmi saytının "bir pəncərə" bölməsində məlumat verilir.
trend-in məlumatına görə, Mərkəz oktyabrın 28-də 100 manatlıq nizamnamə kapitalı ilə qeydiyyata alınıb. Mərkəzin təsisçisi Əmlak Məsələləri Dövlət Komitəsi, qanuni nümayəndəsi isə Elnur Abdullayevdir.
Bir müddət əvvəl nəqliyyat naziri Ziya Məmmədovun dediyi kimi, Azərbaycan Nəqliyyat Nazirliyi Bakı şəhərində nəqliyyatın intelektual idarə edilməsi sistemini dekabrda istismara verməyi planlaşdırır.
"Bakıda nəqliyyatın intellektual idarə edilməsi sisteminin yaradılması layihəsinin dəyəri dəyişməyib. Bu məqsədlə nəzərdə tutulan vəsait işləri başa çatdırmaq üçün kifayət edəcək", - nazir deyib.
"İlk mərhələdə intelektual sistem Bakı şəhərini əhatə edəcək, ikinci mərhələdə Abşeron yarımadasını, sonuncu - üçüncü mərhələdə isə bütün respublikanı əhatə edəcək", - nazir əlavə edib.
Layihənin ilkin dəyəri 77 milyon dollar idi, lakin layihəyə əlavə və dəyişikliklər edildikdən sonra onun qiyməti 19 milyon dollar artıb. Layihənin bahalaşması Nazirlər Kabinetinin "Terror aktlarının qarşısını almaq üçün bir sıra tədbirlərin görülməsi haqqında" qərarına uyğun olaraq, sistemin əlavə funksiyalarının işlənib hazırlanması ilə əlaqədardır.
Dəyişikliklər nəticəsində videoaxınların və onların qeydiyyatının artırılması təmin edilib. Bundan başqa, informasiya terminallarının sayı 300-dən 664 ədədə çatdırılıb. İşlərin genişləndirilməsi çərçivəsində Bakının küçələrində quraşdırılması nəzərdə tutulan informasiya tablolarının sayı 20-dən 48 ədədə çatdırılıb.
Sistem çərçivəsində avtobus dayanacaqları üçün 639-a yaxın, taksilər üçün 140-a yaxın meydançanın yaradılması planlaşdırılır. Bu işlər yol polisi və intellektual sistemin hazırlanması prosesində iştirak edən Cənubi Koreya mütəxəssisləri ilə birgə aparılır.
İntellektual sistem 150-yə yaxın yeni elektron tipli işıqforun quraşdırılmasını nəzərdə tutur.
