Azərbaycan, Bakı, 11 noyabr /Trend, müxbir A.Axundov/
Macarıstan Azərbaycanda ticarət evinin açılması təklifi ilə çıxış edib. Trend-in məlumatına görə, bu barədə cümə günü Azərbaycan-Macarıstan iqtisadi əməkdaşlıq üzrə hökumətlərarası komissiyasının ikinci iclasının yekunları üzrə imzalanan protokolun mətnində deyilir.
"Macarıstan tərəfi kiçik və orta sahibkarlığa dəstək məqsədilə ticarət evləri proqramını başlamaq niyyətində olduğunu bildirib. Bu proqramın ilk addımı Azərbaycanda pilot layihə qismində ticarət evinin açılmasıdır", - protokolda deyilir.
Azərbaycan tərəfi bu layihənin həyata keçirilməsinə dəstək verəcək.
Tərəflər, həmçinin, sənaye və xüsusi iqtisadi zonalar sahəsində əməkdaşlığın və təcrübə mübadiləsinin imkanlarını nəzərdən keçirməyə hazır olduqlarını bildiriblər.
Macarıstanın "Eximbank" QSC və "Mexib" QSC kimi maliyyə strukturları kredit verilməsi və ya sığorta təminatı, yaxud Macarıstan şirkətlərinin qalib olacağı tenderlərdə layihələri maliyyələşdirmək yolu ilə Macarıstan tərəfinin payı iştirakı olmaq şərtilə Azərbaycanın milli layihələrində iştirak etməyə hazır olduqlarını ifadə ediblər.
Azərbaycan Dövlət Statistika Komitəsinin məlumatına görə, 2011-ci ilin yanvar-avqustunda iki ölkə arasında mal dövriyyəsi 13,12 milyon dollar təşkil edib. Burada ixracatın payı 13,115 milyon dollardır.
