Azərbaycan, Bakı, 16 noyabr /Trend, müxbir N.İsmayılova/
2000-2011-ci illərdə Azərbaycanda vergi ödənişindən yayınma ilə bağlı 3184 cinayət faktı aşkar edilib. Bu barədə Vergilər Nazirliyi yanında Vergi Cinayətlərinin İbtidai İstintaqı Departamentinin rəisi Vidadi Məmmədov "Vergilər" qəzetinə müsahibəsində deyib.
"Onlardan 2582-si və ya 89,7 faizi üzrəvergi ödənişindən yayınmaya, 6,8 faizi üzrə qanunsuz sahibkarlığa, 3,1 faizi üzrə müvafiq malların aksiz markası olmadan satışına görə cinayət işi qaldırılıb", - o deyib.
Bu cinayət işlərinin tədqiqatı nəticəsində dövlət büdcəsinə 1,076 milyard manat məbləğində ziyan dəydiyi məlum olub.
2000-2011-ci illərdə vergi cinayətləri faktı üzrə 2747 cinayət işi qaldırlıb ki, nəticədə cinayət törətmiş 1755 şəxs aşkar edilib. Onların sayından 841 nəfər cinayət məsujliyyətinə cəlb edilib.
"Cari ilin təkcə doqquz ayı ərzində dövlət büdcəsinə vurulan ziyanın ödənilməsi məqsədilə büdcəyə 38,628 milyon manat daxilolma təmin olunub. Bütün bunlar ölkədə vergi cinayətkarlığına qarşı aparılan sərt mübarizənin nəticəsidir", - Məmmədov deyib.
Noyabrın 16-na rəsmi məzənnə 0,7866 AZN/USD təşkil edir.
