Azərbaycan, Bakı, 16 noyabr /Trend müxbir S.Ağayeva/
Yaponiya hökuməti Azərbaycana hökumətlərarası komissiyanın növbəti iclasında nəzərdən keçiriləcək iqtisadi əməkdaşlıq üzrə yeni təkliflər paketini təqdim etmək niyyətindədir.
Azərbaycanın Baş nazirinin müavini Abid Şərifov və Yaponiyanın "Itochu" korporasiyasının vitse-prezidenti Yoiçi Kobayaşının rəhbərlik etdiyi komissiyanın iclası noyabrın 22-23-də Bakıda keçiriləcək. Bu barədə çərşənbə günü Trend-ə Azərbaycanın Yaponiyadakı səfiri Gürsel İsmayılzadə deyib.
Səfir bildirib ki, Yaponiya hökuməti energetika sektoru, məişət tullantılarının emalı sahəsi, sosial istiqamətli layihələrdə Azərbaycanla əməkdaşlığın inkişafı məsələlərinə xüsusi diqqət ayırmaq niyyətindədir.
İclasda iştirak və əməkdaşlığın yeni imkanlarının öyrənilməsi üçün müxtəlif Yaponiya şirkətlərinin nümayəndələrindən ibarət böyük nümayəndə heyətinin Bakıya səfəri planlaşdırılır.
İclas zamanı, həmçinin Yaponiya şirkətlərinin Azərbaycanda həyata keçirilən infrastruktur layihələrində iştirakının genişləndirilməsi imkanları müzakirə ediləcək.
"Yaponiyanın infrastruktur və nəqliyyat sahələrində böyük təcrübəsini nəzərə alaraq Azərbaycan hökuməti yüksəksürətli qatarlar üçün dəmir yolları, asma körpülər, yüksəksürətli yolların tikintisi üzrə müxtəlif layihələrdə Yaponiya şirkətlərinin iştirakını məqsədyönlü hesab edir", - İsmayılzadə deyib.
"Yaponlar yolların salınması sferasında qabaqcıl biliklərə və təcrübəyə malikdirlər. Bu, nəzərə alınmaqla artıq bir neçə Yaponiya şirkətinin ölkəmizə səfəri təşkil edilib, müvafiq strukturlarla görüşlər keçirilib. Ümid edirik ki, yaxın gələcəkdə digər ölkələrin şirkətləri ilə yanaşı, Yaponiya şirkətləri də Azərbaycanda həyata keçirilən infrastruktur layihələrində bilavasitə iştirak edəcəklər" , - diplomat əvvəl Trend-ə bildirmişdi.
Hər iki ölkənin hökuməti qarşılıqlı mal dövriyyəsinin həcminin artımına da böyük diqqət ayırmaq niyyətindədir.
Azərbaycan Dövlət Gömrük Komitəsinin məlumatına görə, Azərbaycan və Yaponiya arasında mal dövriyyəsi 2011-ci ilin yanvar-sentyabrında ötən ilin analoji dövrü ilə müqayisədə 22,7 faiz artaraq 125,6 milyon dollar təşkil edib.