Azərbaycan, Bakı, 25 noyabr / Trend müxbir İ.Xəlilova /
Azərbaycanın Vergilər Nazirliyi gəlir vergisinin dərəcəsinin azaldılmasını və aylıq vergi gəlirinin limitində dəyişiklik edilməsini məqsədəuyğun hesab etmir. Trend-in məlumatına görə, bu barədə dünən vergilər naziri Fazil Məmmədov Parlamentdə 2012-ci il və sonrakı üç ilin dövlət büdcəsi layihəsinin müzakirələri zamanı bildirib.
Bu gün Azərbaycanda fiziki şəxslərin aylıq gəlirlərindən 14 faizlik dərəcə ilə vergi tutulur, əgər aylıq vergi gəlirinin məbləği 2000 manatı ötmürsə, o zaman 280 manat, üstəgəl 2000 manatdan yuxarı olan məbləğdən 30 faiz ödənilir.
2010-cu il yanvarın 1-dən muzdlu işçilər üçün vergi gəlirinin maksimum məbləği 35 faizdən 30 faizədək, hüquqi şəxs yaratmadan sahibkarlıq fəaliyyəti ilə məşğul olan fiziki şəxslər üçün isə 35 faizdən 20 faizədək azaldılıb.
"Ölkə hakimiyyətinin iqtisadi bloku hesab edir ki, 14 faizlik dərəcə ilə 2000 manatadək olan gəlirdən vergi normal səviyyədir, çünki o, əhalinin böyük hissəsini əhatə edir. 30 faizlik dərəcə əməkhaqqının iki min manatı ötəcəyi halda tətbiq edilə bilər. Bunu isə yalnız bankirlər ödəyəcəklər ki, bu da bütün ölkə əhalisinin rifahının yaxşılaşmasına mənfi təsir göstərə bilməz", - nazir deyib.
Məmmədovun sözlərinə görə, bütün dünyada təcrübə belədir və Azərbaycan da bu təcrübədən çıxış edir.
Noyabrın 25-nə olan rəsmi məzənnə 0,7865 AZN/USD təşkil edir.