Azərbaycan, Bakı, 8 dekabr /Trend, müxbir N.İsmayılova/
2011-ci ilin yanvar-oktyabrında Azərbaycanın dövlət büdcəsinin mədaxil hissəsinə faktiki daxilolmalar ötən ilin analoji dövrü ilə müqayisədə 25,3 faiz artaraq 10548,7 milyon manat (ÜDM-in 25,9 faizi) təşkil edib. Bu barədə cümə axşamı Trend-ə hökumətdən bildirilib.
Dövlət büdcəsinin xərcləri 29,5 faiz artaraq 9897,5 milyon manat (ÜDM-in 24,3 faizi) olub. Yanvar-oktyabrda büdcənin profisiti 651,2 milyon manat olub ki, bu da ÜDM-in 1,6 faizini təşkil edib.
Strukturda gəlirin 45,4 faizi (4790,8 milyon manat) Vergilər Nazirliyinin hesabına təmin edilib. Gömrük rüsumları və vergilərindən 938 milyon manat (8,9 faizlik xüsusi çəki), digər mənbələrin hesabına gələn gəlir isə 4819,9 milyon manat (45,7 faiz) təşkil edib.
Hesabat dövrü ərzində ƏDV-dən 1778 milyon manat gəlir daxil olub ki, bu da ümumi gəlirin 16,9 faizini təşkil edir. Mənfəət vergisi 2145,9 milyon manat (20,3 faiz), gəlir vergisi 565,4 milyon manat (5,3 faiz), aksiz vergisi 410,3 milyon manat (3,9 faiz), əmlak vergisi 86,9 milyon manat (0,8 faiz), yeraltı sərvətlər vergisi 107,2 milyon manat (1 faiz), torpaq vergisi 30 milyon manat (0,3 faiz), xarici iqtisadi fəaliyyətə görə vergi isə 314,3 milyon manat (3 faiz) təşkil edib.
Əhalinin sosial müdafiəsi və təminatına dövlət büdcəsindən yanvar-oktyabrda 1250,9 milyon manat (12,6 faizlik xüsusi çəki) xərclənib. Təhsilə 936,9 milyon manat (9,5 faiz), səhiyyəyə 364,6 milyon manat (3,7 faiz), prokurorluq, təhlükəsizlik və hüquq-mühafizə orqanlarının saxlanmasına 516,9 milyon manat (5,2 faiz), iqtisadiyyata investisiya qoyuluşuna isə 4325,7 milyon manat (43,7 faiz) xərclənib.
Qoyulan kapitalın ümumi həcminin 181,6 milyon manatı (1,8 faiz) kommunal xərclərə, 343,4 milyon manatı (3,5 faiz) kənd, meşə təsərrüfatı və balıqçılığa, 3947,2 milyon manatı sənaye, tikinti və faydalı qazıntılara (36,9 faiz), 44,7 milyon manat isə (0,5 faiz) nəqliyyat və rabitəyə yönəldilib.
Dekabrın 8-nə olan rəsmi məzənnə 0,7864 AZN/USD təşkil edir.