Azərbaycan, Bakı, 14 dekabr /Trend, müxbir N.İsmayılova/
2011-ci ilin üç rübü ərzində Azərbaycan iqtisadiyyatına cəlb olunmuş xarici kapitalın ümumi həcmi ötən ilin analoji dövrü ilə müqayisədə 2,2 faiz artaraq 5,8 milyard dollar təşkil edib. Trend-in məlumatına görə, bu barədə çərşənbə günü Azərbaycan Mərkəzi Bankının yaydığı tədiyyə balansında məlumat verilir.
İqtisadiyyatda birbaşa investisiyalar şəklində xarici kapitalın ümumi həcmi 3,1 milyard dollar təşkil edib. Bu investisiyaların strukturunda neft-qaz sektorunun xüsusi çəkisi 77,9 faiz olub. Bu investisiyalar iri neft-qaz layihələrinin, əsasən BP Exploration Ltd. (Şahdəniz layihəsi) və Azərbaycan Beynəlxalq Əməliyyat Şirkətinin "Azəri-Çıraq-Günəşli" yataqlar blokunda gördüyü işlərin maliyyələşdirilməsi ilə əlaqədar istifadə olunub.
Mərkəzi Bankın qiymətləndirməsinə əsasən, qeyri-neft sektoruna cəlb olunan birbaşa investisiyaların həcmi 686 milyon dollar - ölkəyə cəlb olunmuş birbaşa investisiyaların ümumi həcminin 22,1 faizini təşkil edir.
