Azərbaycan, Bakı, 14 dekabr /Trend, müxbir N.İsmayılova/
Avropa Yenidənqurma və İnkişaf Bankının (AYİB) Direktorlar Şurası çərşənbə günü Azərbaycan bankı "AccessBank"a yerli mikro, kiçik və orta müəssisələr üçün maliyyələşdirməyə çıxışın genişləndirilməsi məqsədilə 25 milyon dollar həcmində maliyyələşdirmənin verilməsini bəyənib. Bu barədə çərşənbə günü Trend-ə AYİB-in Bakı ofisinin rəhbəri Neyl Makkeyn bildirib.
"Kredit sazişinin imzalanması təxminən üç həftə ərzində baş tutacaq", - o deyib.
AYİB 2 tranşda kredit verməyi planlaşdırır -15 milyon dollar və 10 milyon dollar. Kredit ikiilik güzəştli müddətlə beş ilə nəzərdə tutulub.
Maliyyələşdirmənin verilməsində əsas məqsəd maliyyə vasitəçiliyinin artırılması və mikro, kiçik və orta müəssisələrin maliyyələşdirilməsinə çıxış hesabına bazarın genişləndirilməsi, kənd təsərrüfatı kredit məhsullarının gələcək artımı, bacarıqların ötürülməsidir.
Tamamilə mikro, kiçik və orta müəssisələrə maliyyə xidmətlərinin verilməsinə yönələn Azərbaycanın yeganə kommersiya bankı "AccessBank" digər yerli banklara xeyli nümayişkaranə təsirə malikdir.
"АccessBank"ın missiyası, aşağı və orta gəlirli Azərbaycan ailələrinə, eləcə də mikro və kiçik sahibkarlara maliyyə xidmətləri göstərməkdən ibarətdir. "АccessBank" beynəlxalq "Fitch" reytinq agentliyi tərəfindən Azərbaycan bankları arasında ən etibarlı bank adına layiq görülüb (BB+), həmçinin Global Finance (2011-ci il) və Euromoney Nəşriyyat Qrupu (2010-2011-ci illər) tərəfindən "Azərbaycanın ən yaxşı bankı", "The Banker" nəşri tərəfindən isə "İlin bankı" adına layiq görülüb. "AccessBank" 100 faiz xarici kapitala malikdir və 6 beynəlxalq maliyyə institutuna məxsusdur. Bunlar Avropa Yenidənqurma və İnkişaf Bankı, Beynəlxalq Maliyyə Korporasiyası, Qara dəniz Ticarət və İnkişaf Bankı, Kfw Development Bank - Almaniya Hökumətinin İnkişaf Bankı (hərəsi 20 faiz), mikromaliyyələşdirmə sahəsində strateji maliyyəçi rolunda çıxış edən "Access Holding" (16.5 faiz) və Almaniyanın LFS Financial Systems GmbH (3.5 faiz) şirkətləridir.