Azərbaycan, Bakı, 3 fevral /Trend müxbir A. Axundov/
Fevralın sonunda "Fidan Sığorta" şirkətinə problemlərin həll edilməsi üçün verilən altı aylıq müddət sona çatır. Həmin problemlər səbəbindən şirkətə sığorta fəaliyyəti göstərmək üçün verilən lisenziyanın fəaliyyəti dayandırılıb.
Azərbaycan Maliyyə Nazirliyi yanında Dövlət Sığorta Nəzarəti Xidməti ötən il avqustun sonunda "Fidan Sığorta"nın lisenziyasının fəaliyyətini dayandırıb. Dövlət Xidməti bu qərarı şirkətin maliyyə sabitliyi və sığortaçının ödəniş qabiliyyəti üzrə mövcud normativlərin təminatı ilə bağlı bildirişləri yerinə yetirməməsi ilə əsaslandırıb.
2011-ci il yanvarın 1-nə Maliyyə Nazirliyinin sığortaçıların nizamnamə kapitalına qarşı minumum tələbləri 3 milyon manat, 2012-ci ilin əvvəlinə 4 milyon manat təşkil edib. Halbuki "Fidan Sığorta" SŞ-in ödənilmiş nizamnamə kapitalı 2,26 milyon manatdır.
Hazırda şirkətdən quruma müraciət daxil olmayıb. Bu barədə cümə günü Trend-ə Dövlət Sığorta Nəzarəti Xidməti sədrinin müavini Müşfiq İsrafilov bildirib.
"Əgər şirkət müəyyən edilmiş müddətdə öz problemlərini həll edə bilməsə, qanunverciliyə uyğun tədbirlər görüləcək" , - o deyib.
Təsisçisi 1 hüquqi və 2 fiziki şəxs olan "Fıdan Sığorta" şirkəti Azərbaycanda 1994-cü ildən fəaliyyət göstərir.
Fevralın 3-nə olan rəsmi məzənnə 0,7863 AZN/USD təşkil edir.