Azərbaycan, Bakı, 27 fevral / Trend, müxbir İ.Xəlilova /
Azərbaycanda makroiqtisadi vəziyyətin və onun perspektivlərinin müzakirəsi məqsədilə Beynəlxalq Valyuta Fondunun (BVF) yaxın Şərq və Mərkəzi Asiya Departamentində şöbə müdirinin müavini Nadim İlahinin başçılıq etdiyi nümayəndə heyəti aprelin 24-də Bakıya gələcək. Bu barədə bazar ertəsi Trend-ə ölkə hökumətindən məlumat verilib. Missiya mayın 3-dək Azərbaycanda olacaq.
"İqtisadi inkişafın perspektivləri üzrə ölkə hökumətinin qısa və ortamüddətli vəzifələrinin qiymətləndirilməsinin aparılmasında əsas məqsəd BVF ilə IV saziş maddəsi üzrə müzakirələrin prioritet istiqamətlərinin müəyyən edilməsidir", - hökumətdəki mənbə deyib.
Səfər zamanı Valyuta Fondunun texniki yardımının istiqamətlərinin, bank sektorundakı vəziyyətin, fiskal, pul-kredit, məzənnə siyasətinin, ölkədə maliyyə stabilliyinin gücləndirilməsi üçün ölkədə aparılan makroprudensial və nəzarət tədbirlərinin müzakirəsi də gözlənilir.