Azərbaycan, Bakı, 5 mart /Trend, müxbir A.Axundov/
Azərbaycan iqtisadiyyatı üçün əsas vəzifə onun neft faktorundan asılılığının azaldılmasıdır. Trend-in məlumatına görə, bu barədə bazar ertəsi Bakıda keçirilən İkinci Yüksək Səviyyəli İqtisadi Siyasət Forumu zamanı Azərbaycan Prezidenti Administrasiyasının iqtisadi siyasət məsələləri üzrə dövlət müşaviri Vahid Axundov bildirib.
"Bu gün dövlət xərclərində, ixracatda neft amili olduqca yüksəkdir. Bu, sosial-iqtisadi sabitlik üçün təhlükə yaradır. Şübhəsiz ki, yaranmış vəziyyətdə iqtisadiyyatın sağlamlaşdırılması üçün alternativ sektorların inkişafı zəruridir", - Axundov deyib.
Onun sözlərinə görə, mövcud vəziyyətdə prioritetlərdən biri xüsusilə aqrar sektorun inkişafıdır.
"Əlverişli bioiqlim potensialı və çətin əmək tələb edən innovativ sahələrə malik aqrar sektorun inkişafı prioritetdir. Bu sahələr üçün inkişaf platformalarının hazırlanması lazımdır. Məqsəd buraya özəl kapital, birbaşa xarici investisiyaları cəlb etməkdir", - Axundov qeyd edib.
Onun sözlərinə görə, məhdud daxili bazar şəraitində kapitalın ixracı obyektiv olaraq sürətlənir, bu proses isə optimal şəkildə tənzimlənməlidir.
"Bundan başqa, kiçik və orta sahibkarlığın inkişafını təmin etmək üçün ixracatın stimullaşdırılması, yerli və xarici istehsalçılarla tərəfdaşlıq əlaqələrinin qurulması, ölkənin daxilində xüsusi iqtisadi zonaların formalaşdırılması və digər metodlar tətbiq edilməlidir. Burada şübhəsiz ki, dövlətin rolu olmalıdır, lakin bununla yanaşı, paternalizmə imkan vermək olmaz, iqtisadi proseslər kifayət qədər liberal şəraitdə inkişaf etməlidir", - Axundov bildirib.