Azərbaycan, Bakı, 10 aprel /Trend, müxbir Ə.Həsənov/
2012-ci ilin fevralında Bakının ilkin mənzil bazarında qiymətlər əvvəlki ayla müqayisədə 1,1 faiz azalaraq bir kvadratmetrə görə 815 manat təşkil edib. Bu barədə çərşənbə axşamı Trend-ə "Əmlak Bazarı İştiraçıları" İctimai Birliyindən məlumat veriblər.
Əvvəlki rüblə müqayisədə qiymətlər 1,4 faiz, ötən ilin fevralına nisbətən isə 3 faiz aşağı düşüb. Böhran dövrünün başlaması (2008-ci ilin sentyabrı) ilə müqayisədə qiymətlər 31,7 faiz ucuzlaşıb.
Əvvəlki aylarda olduğu kimi, fevralda Bakının ilkin mənzil bazarının monitorinqi 424 yüksəkmərtəbəli yaşayış binasını əhatə edib. Tikinti şirkətlərinin sayı isə əvvəlki səviyyədə (151 ədəd) qalıb.
Yeni tikilidə birotaqlı mənzilin orta hesabla sahəsi 60,7 kvadratmetr, ikiotaqlıda 92,1, üçotaqlıda 131,8, dördotaqlıda 182,9, beşotaqlıda isə 238,3 kvadratmetr təşkil edib.
