Azərbaycan, Bakı, 16 aprel/Trend, müxbir A. Axundov/
2011-ci ildəki fəaliyyətin yekunları üzrə Azərbaycanın AXA MBASK sığorta şirkətinin aktivləri ötən ilin əvvəlinə (18,35 milyon manat) nisbətən 24,4 faiz artaraq 22,82 milyon manat təşkil edib. Trend-in məlumatına görə, bu barədə bazar ertəsi şirkətin rəsmi mətbuatda dərc edilən balans hesabatında deyilir.
Sığorta şirkətinin maliyyə hesabatlılığının auditini "Kaspian Konsaltinq" aparıb.
2011-ci ilin sonunda şirkətin uzunmüddətli aktivləri il ərzində 25 faiz azalaraq 6,09 milyon manat, qısamüddətli aktivləri isə illik 24 faiz artımla 16,73 milyon manat təşkil edib.
2011-ci ildə pul vəsaitlərində və onların ekvivalentlərində 11,24 milyon manat, depozit hesablarında 8,8 milyon manat, cari hesabda isə 2,236 milyon manat yığılıb.
2011-ci ilin yekunları üzrə AXA MBASK şirkətinin ödənilmiş nizamnamə kapitalı 6,73 milyon manat səviyyəsində olub, 2010-cu ildə bu rəqəm 5,73 milyon manat təşkil edib.
Şirkət 2011-ci ili 47,76 min manat həcmində xalis gəlirlə başa çatdırıb.
Ötən ilin sonuna şirkətin məcmu kapitalı 2010-cu illə müqayisədə 9,8 faiz azalaraq 8,116 milyon manat təşkil edib.
Şirkətin nizamnamə öhdəlikləri 57,22 faiz artaraq 14,7 milyon manat, ümumilikdə kapital və öhdəliklər isə təqribən 24,4 faiz artımla 22,82 milyon manat təşkil edib.
Ötən ilin yekunları üzrə şirkətin gəlirləri 11,883 milyon manat, xərcləri isə 11,835 milyon manat olub.