...

Azərbaycan İnvestisiya Şirkətinin yatırımlarının yarıdan çoxu ağır sənayenin payına düşür

Biznes və iqtisadiyyat xəbərləri Materials 21 Aprel 2012 14:39 (UTC +04:00)

Azərbaycan, Bakı, 21 aprel /Trend, müxbir A.Axundov/

Azərbaycan İnvestisiya Şirkətinin (AİŞ) investisiya portfelinin 56 faizi ağır sənaye sahəsində layihələrin maliyyələşdirilməsinin payına düşür. Bu barədə şənbə günü Trend-ə şirkətin yeganə təsisçisi kimi çıxış edən Azərbaycanın İqtisadi İnkişaf Nazirliyindən məlumat verilib.

"Şirkətin investisiyalarının 19,5 faizi kənd təsərrüfatı, 8,5 faizi logistika, 7,2 faizi qida sənayesinin payına düşür, 8,4 faiz birgə fondlara yönəldilib", - nazirlikdən deyiblər.

2011-ci ildə AİŞ-in aktivləri 4,5 milyon manat artaraq ilin sonunda 174,8 milyon manata çatıb, mənfəət isə 14,5 milyon manat təşkil edib.

2011-ci ildə Hövsan qəsəbəsində müasir süd zavodunun tikintisi başa çatıb və müəssisə sınaq rejimində işləməyə başlayıb. Bununla yanaşı, Qaradağ Sement Zavodunda quru istehsal texnologiyaları əsasında yeni sobanın tikintisi başa çatıb və orada sınaq rejimində klinker istehsal edilir.

Ötən il Səngəçal Qaradağ neft-qaz terminalı layihəsinin birinci mərhələsinin reallaşdırılmasına başlanılıb. AİŞ, ARDNŞ və Sinqapurun "Keppel Offshore & Marine" şirkətinin iştirak etdiyi Bakı gəmiqayırma zavodunun tikintisi qrafikə uyğun gedir.

Nazirliyin məlumatına görə, habelə şirkətin "Ağstafa Aqroservis", uşaq qidalarının qablaşdırılması, istifadə olunmuş akkumlyatorların təkrar emalı kimi bir sıra layihələrə investisiyalarının qoyulması üçün müvafiq işlər görülür.

Xəbər lenti

Xəbər lenti