Azərbaycan, Bakı, 25 aprel /Trend, müxbir A.Axundov/
Asiya İnkişaf Bankının (AİB) Direktorlar Şurası Azərbaycanla yeni tərəfdaşlıq strategiyasını (Country Partnership Strategy) 2013-cü ilin birinci rübündə bəyənəcək. Bu barədə çərşənbə günü Trend-ə AİB-in ölkədəki nümayəndəliyinin rəhbəri Olli Noroyono bildirib.
AİB əvvəllər strategiyanı 2012-ci ilin sonunda bəyənməyi planlaşdırırdı.
"Biz strategiya üzərində işin başlanması üçün dövlət, iqtisadi, sosial və özəl sektorların tematik qiymətləndirilməsini aparırıq. Strategiyanı ilin sonunadək hazırlamaq nəzərdə tutulub. Onu 2013-cü ilin birinci rübündə təsdiq etməyi planlaşdırırıq. Birbaşa sənəd üzərində iş hələ başlamayıb", - Noroyono deyib.
Onun sözlərinə görə, strategiyanın hansı dövrü əhatə edəcəyi hələlik məlum deyil.
"Bank əslində strategiyanın beşillik dövrü (2013-2017-ci illər) əhatə etməsini istərdi. Çünki onu yenidən nəzərdən keçirtməyə ehtiyac qalmayacaq. Lakin hökumət onun daha uzunmüddətli - 8 ildən 15 ilədək dövrü əhatə etməsini istəyir. Biz hazırda bu məsələ üzrə danışıqlar aparırıq", - o qeyd edib.
Onun sözlərinə görə, AİB yeni sahələrdə əməkdaşlığa istiqamətlənib və bu məqsədlə 2012-ci ildə ölkə hökuməti ilə fəal danışıqlar aparılacaq və bankın digər istiqamət və sahələrdə fəaliyyət perspektivləri müzakirə ediləcək.
