Azərbaycan, Bakı, 10 sentyabr /Trend, müxbir A.Axundov/
Bakı Metropoliteninin yaxın 20 il ərzində inkişaf proqramının reallaşdırılmasına 6-7 milyard manat həcmində investisiya tələb olunur. Trend-in məlumatına görə, bu barədə bazar ertəsi jurnalistlərə Bakı Metropoliteninin rəis müavini Arif Rəsulov bildirib.
"Proqram 53 yeni stansiyanın tikintisini və 83,4 kilometr uzunluğunda yeni metro xətlərinin çəkilməsini nəzərdə tutur. Bu isə 165 kilometr uzunluğunda tunelin tikintisi deməkdir. Stansiyaların tikintisi və digər xərclər daxili olmaqla, bir kilometr xəttin çəkilməsi orta hesabla 100-110 milyon manat tələb edir. Bu və yeni metro xətlərinin bir hissəsinin səthdən keçəcəyi nəzərə alınaraq, 20 il ərzində bu layihəyə 6-7 milyard manat investisiya qoyulacaq", - Rəsulov deyib.
Onun sözlərinə görə, layihə hələlik ancaq dövlət vəsaiti hesabına tam maliyyələşdirilir.
"Hələlik biz digər maliyyə mənbələrinə müraciət etməmişik. Təbii ki, proqramın reallaşmasının sürətlənməsi üçün əlavə maliyyə mənbələrində maraqlıyıq, lakin konkret layihələr yoxdur", - Rəsulov qeyd edib.
Hazırda 2011-ci ildə qəbul edilən proqramın reallaşdırılmasına 300 milyon manatdan çox vəsait ayrılıb.
"Qrafikə əsasən, bu məbləği ilin sonunadək xərcləməliyik", - Rəsulov bildirib.
