Azərbaycan, Bakı, 26 sentyabr /Trend, müxbir E.İsmayılov/
"Azərbaycan Dəmir Yolları" QSC "Rusiya Dəmir Yolları" ASC ilə Azərbaycan və Rusiya arasındakı reyslərdə işləmək üçün Azərbaycana məxsus qatarların qaytarılması məsələsi ilə bağlı danışıqlar aparır. Bu barədə çərşənbə günü Trend-ə QSC-nin mətbuat xidmətinin rəhbəri Nadir Əzməmmədov bildirib.
"Hazırda bizim qatarlarımızın qaytarılması məsələsi Rusiya tərəfi ilə müzakirələrin mövzusudur", - Əzməmmədov qeyd edib.
QSC-yə məxsus vaqonların əsaslı təmirə göndərilməsi səbəbindən Moskva və Sankt-Peterburq istiqamətində sərnişin reyslərində "Rusiya Dəmir Yolları" ASC-yə məxsus qatarlar işləməyə başlayıb.
"Azərbaycan Dəmir Yolları"nın 50 vaqonu Azərbaycanda sərnişin qatarlarının əsaslı təmiri üzrə texnologiyanın olmaması səbəbindən Ukraynaya göndərilib.
Əzməmmədovun sözlərinə görə, əsaslı təmirə göndərilən 50 vaqondan 15-i artıq Azərbaycana gətirilib.
"Hazırda artıq həmin qatarlara baxış prosesi başa çatır", - o qeyd edib.