Azərbaycan, Bakı, 8 oktyabr /Trend, müxbir A.Axundov/
Azərbaycan Mərkəzi Bankı (AMB) yanında Azərbaycan İpoteka Fondunun (AİF) xətti ilə verilən adi ipoteka kreditinin maksimum həcmi ikiqat artırıla bilər. Bu barədə bazar ertəsi Trend-ə AMB-nin baş direktoru Rəşad Orucov deyib.
"Hazırda ipoteka kreditləşməsinin yeni şərtlərinin qəbulu müzakirə edilir. Sosial və adi ipoteka üzrə məbləğin artırılması ilə bağlı təklif var. Onlardan biri adi ipoteka kreditinin maksimum məbləğinin 100 min manata, sosial ipoteka üzrə isə 50-60 min manata çatdırılmasıdır", - Orucov deyib.
Onun sözlərinə görə, həmçinin, kreditlər üzrə faiz dərəcələrinə yenidən baxılacaq.
"Bütün bunlar müzakirə ərəfəsindədir və güman edirik ki, qərar tezliklə qəbul ediləcək", - Orucov vurğulayıb.
AMB-nin baş direktoru cari ilin sonunadək bu məsələyə dair irəliləyiş əldə ediləcəyinə ümidvar olduğunu bildirib.
