Azərbaycan, Bakı, 9 oktyabr /Trend, müxbir E.İsmayılov/
"Silk Wind" layihəsi çərçivəsində Azərbaycan, Qazaxıstan, Gürcüstan və Türkiyə iki sənəd imzalayacaqlar. Bu barədə çərşənbə axşamı Trend-ə TRACECA-nın (Avropa-Qafqaz-Asiya nəqliyyat dəhlizi) Azərbaycandan olan milli katibi Akif Mustafayev bildirib.
"Silk Wind" layihəsinin məqsədi Avropa-Qafqaz-Asiya dəhlizi ilə yük axınının cəlb edilməsi üçün ilkin informasiya mübadiləsinin təkmilləşdirilmiş sistemi ilə multimodal nəqliyyatın sürət blok-qatarının marşrutunun yaradılmasıdır.
Mustafayevin sözlərinə görə, ilk sənəd dörd ölkənin Nəqliyyat nazirlikləri arasında qarşılıqlı anlaşma memorandumu, ikinci isə multimodal daşımaların inkişafı haqqında sazişdir.
Hazırda bu sənəd üzərində, eləcə də dövlətdaxili razılaşdırma işləri gedir.
"Silk Wind" layihəsi praktiki olaraq Bakı-Tbilisi-Qars dəmiryol xəttinin əlavəsidir", - Mustafayev qeyd edib.
Mustafayevin fikrincə, dörd ölkənin nazirlikləri arsında qarşılıqlı anlaşma memorandumu bu ilin sonu - gələn ilin əvvəlində imzalana bilər, multimodal daşımaların inkişafı haqqında saziş isə 2013-cü ilin mayında Düşənbədə keçiriləcək növbəti hökumətlərarası TRACECA konfransında imzalanacaq.