Azərbaycan, Bakı, 2 may /Trend, müxbir A.Axundov/
Nəqliyyat Nazirliyi ictimai nəqliyyatda gediş kartlarının buraxılması ilə məşğul olacaq prosessinq mərkəzinin yaradılması üzrə işləri başa çatdırır. Bu barədə cümə axşamı Trend-ə nəqliyyat nazirinin müavini Musa Pənahov deyib.
Onun sözlərinə görə, işlər "MasterCard" beynəlxalq ödəniş sistemi və bir sıra banklarla birgə aparılır.
"Hazırda avtobuslarda avadanlıqlar quraşdırılır, mütəxəssislər və sürücülər öyrədilir. Artıq gediş haqqı kartlarına sifariş verilib", - Pənahov qeyd edib.
Onun sözlərinə görə, hazırda əsas vəzifə ölkə əhalisi arasında nəqliyyat üzrə gediş kartlarının paylanması, həmçinin əhali arasında bu kartlardan istifadə ilə bağlı izahat işlərinin aparılmasıdır.
"İlin sonunadək Bakıdakı avtobuslarda gediş haqqı yalnız elektron kartlar vasitəsilə ödəniləcək", - Pənahov deyib.
Kartın balansının yüklənməsi şəhərin müxtəlif rayonlarında istifadə edilə biləcək banklar, köşklər və mobil terminallar vasitəsilə mümkün olacaq.
