Azərbaycan, Bakı, 27 avqust /Trend, müxbir E. Əliyev/
Cari ilin yanvar-iyul aylarında Gürcüstanda ixracın 25 faizindən çoxu Azərbaycanın payına düşür.Trend-in məlumatına görə, bu barədə Gürcüstan Milli Statistika İdarəsinin saytında yerləşdirilən hesabatda bildirilib.
Hesabatda bildirilir ki, yanvar-iyul aylarında Gürcüstandan Azərbaycana 396,78 milyon dollar və ya ümumi ixracın 26,9 faiz həcmində məhsul ixrac olunub.
Azərbaycana ixrac ötən ilin analoji dövrü ilə müqayisədə 14,72 faiz artıb. Müqayisə üçün: 2012-ci ilin yanvar-iyun aylarında Azərbaycana 345,86 milyon dollar həcmində gürcü məhsulu ixrac olunub.
İkinci yeri Ermənistan tutur. 2013-cü ilin yanvar-iyul aylarında ölkəyə 167,79 milyon dollar (ümumi ixracın 11,4 faizi miqdarı) həcmində gürcü məhsulu ixrac edilib.
Gürcüstan məhsullarının ixracının həcminə əsasən üçüncü yeri 100,23 milyon dollar (ümumi ixracın 6,8 faizi) vəsaitlə Türkiyə tutur.
Ümumilikdə, 2013-cü ilin yanvar-iyul aylarında Gürcüstanda ixracın həcmi 1,48 milyard dollar olub ki, bu da 2012-ci ilin analoji dövrü ilə müqayisədə 9,35 faiz çoxdur.
