Azərbaycan, Bakı, 2 oktyabr /Trend, müxbir E.Əliyev/
Perspektivdə 2020-ci ilə Azərbaycanda adambaşına düşən sığorta mükafatlarının orta məbləği 100 manatı ötəcək. Trend-in məlumatına görə, bunu çərşənbə günü Azərbaycan Sığortaçılar Assosiasiyasının rəhbəri Orxan Bayramov "Azərbaycanın sığorta bazarının dinamik inkişafı: 2003-2013" adlı konfransda çıxış edərkən deyib.
Onun sözlərinə görə, 2002-ci ildə bu göstərici 5 manat olduğu halda, 2012-ci ildə təqribən 22 faiz orta illik artımla 37 manata çatıb.
O.Bayramov bildirib ki, son 10 ildə Azərbaycanın sığorta bazarı 8,2 dəfə artaraq 41,87 milyon manatdan 341,65 milyon manata çatıb:
"Hesabat dövründə könüllü sığorta növləri üzrə mükafatlar 6 dəfə, icbari sığorta növləri üzrə mükafatlar isə 40 dəfədən çox artıb. Bundan başqa, sığorta məhsullarının çeşidinin genişlənməsi sığorta ödənişlərinin 14 dəfə, o cümlədən könüllü sığorta növləri üzrə 15, icbari sığorta növləri üzrə ödənişlərin isə 11 dəfə artmasına imkan yaradıb. Orta illik artım təqribən 30 faizə bərabər olub".