Azərbaycan, Bakı, 14 yanvar /Trend, müxbir T.Cəfərov/
İran ötən 9 ay ərzində Azərbaycana 1481 minik avtomobili ixrac edib. İxrac olunan avtomobillərin ümumi dəyəri 10 milyon dollar təşkil edib. Bu barədə Trend İranın Gömrük Təşkilatının rəsmi açıqlamasına istinadən məlumat verir.
Məlumata əsasən, 2013-cü ilin noyabr-dekabr ayları ərzində İrandan 282 ədəd "KIA Pride" markalı avtomobil Azərbaycana ixrac olunub. Onların ümumi dəyəri 1 milyon 635 min 600 dollar təşkil edib.
Dekabr ayı ərzində İranın SAIPA avtomobilqayırma şirkətindən Azərbaycana 96 TİBA markalı avtomobil ixrac olunub. Həmin avtomobillərin ümumi dəyəri isə 710 min 400 dollar təşkil edib.
Bundan başqa, İrandan Azərbaycana "Samand", "Peykan" və "Tondar" markalı avtomobillər də ixrac olunub. Onların ümumi dəyəri isə 673 min dollar təşkil edib.
İrandan Azərbaycana gətirilən bir "KIA Pride" 5800 dollara, TİBA 7400 dollara və "Samand" isə 8000 dollara başa gəlir.
İranın Gömrük Təşkilatının məlumatına əsasən, İranda istehsal olunan avtomobillər əsasən Azərbaycan, Misir və İraqa ixrac edilir.
İrandan Azərbaycana ötən 9 ay ərzində ümumilikdə 350 min dollardan çox dəyəri olan 27 min ton minik avtomobillərinin ehtiyat hissələri, o cümlədən elektrik avadanlıqları, radiator, aspirator, avtomobil şini və s. ixrac olunub.