Azərbaycan, Bakı, 23 yanvar /Trend, müxbir A.Axundov/
2014-cü ilin yanvar ayında Azərbaycanda 352,7 milyon manat dəyərində tikinti işləri aparılıb. İnşaat işlərinin həcmi ötən ilin analoji dövrü ilə müqayisədə 4,1 faiz azalıb. Trend-in məlumatına görə, bu barədə Dövlət Statistika Komitəsinin hesabatında deyilir.
Görülmüş tikinti işlərinin ümumi həcmindən 57,6 faiz yeni tikinti, yenidənqurma və genişləndirmə, 19,6 faizi əsaslı təmir, 2,9 faizi cari təmir, 19,9 faizi isə digər inşaat işlərinin payına düşüb.
İnşaat işlərinin 75,6 faizi qeyri-dövlət mülkiyyətli tikinti müəssisələri tərəfindən həyata keçirilib.
2013-cü ildə Azərbaycanın inşaat bölməsinə 100,9 min nəfər cəlb edilib, tikinti sektorunda nominal əməkhaqqı 625,5 manat təşkil edib ki, bu da 2012-ci ilin müvafiq dövrünə nisbətən 6,5 faiz çoxdur.
Belə ki, dövlət şirkətlərində orta aylıq əməkhaqqı 505,5 manat (il ərzində 6 faiz artım), özəl şirkətlərdə isə 680,4 manat (4,2 faiz artım) təşkil edib.
Binaların tikintisi sahəsində əməkhaqqı il ərzində 1,9 faiz artaraq orta hesabla 568,3 manat, ixtisaslaşdırılmış tikinti işlərində 7,8 faiz artaraq 765,9 manat, mülki təyinatlı tikinti işlərində isə 7,8 faiz artaraq 608,3 manat olub.
