Azərbaycan, Bakı, 27 mart /Trend, müxbir E.Əliyev/
2014-cü ilin yanvar-fevral aylarında Gürcüstandan Azərbaycana 5,87 milyon dollar dəyərində 2,28 min ton diri çəkiyə malik iribuynuzlu mal-qara idxal edilib. Trend-in məlumatına görə, bu barədə Gürcüstan Milli Statistika Xidmətinin hesabatında deyilir.
Hesabatda qeyd edilir ki, hesabat dövründə bu sahənin xüsusi çəkisi Gürcüstandan Azərbaycana ümumi ixracın həcminin 7,88 faizini təşkil edib.
Ötən ilin eyni dövrü ilə müqayisədə Gürcüstandan idxal olunan iribuynuzlu mal-qaranın idxalı 3,29 faiz, say etibarilə isə 0,1 faiz azalıb. Müqayisə üçün: 2013-cü ilin yanvar-fevralında Gürcüstandan Azərbaycana 6,07 milyon dollar dəyərində diri çəkisi 2,38 min ton olan iribuynuzlu mal-qara idxal edilib.
Bu ilin yanvar-fevral aylarında Gürcüstandan Azərbaycana 74,53 milyon dollar dəyərində mal ixrac edilib ki, bu da hesabat dövründə ölkə ixracının ümumi həcminin 24,3 faizini təşkil edir. İl ərzində Azərbaycana ixracat 14,47 faiz azalıb. Müqayisə üçün: 2013-cü ilin yanvar-fevralında Azərbaycana 87,14 milyon dollar dəyərində Gürcüstan mallları ixrac edilib.
