Azərbaycan, Bakı, 30 may /Trend, müxbir E.Əliyev/
"Paşa Bank" ASC 100 milyon manat məbləğinədək istiqrazların 3 emissiyasının anderrayteri qismində çıxış edəcək. Bunu cümə günü Trend-ə bankın baş investisiya direktoru Taleh Kazımov deyib.
Onun sözlərinə görə, bank cari il belə əməliyyat hələ keçirməyib: "Eyni zamanda, biz bir neçə emitentin istiqrazlarının 3 buraxılışının anderrayteri olmaq niyyətindəyik. İlk buraxılış may-iyun, ikincisi avqust-sentyabr, üçüncüsü isə oktyabr-noyabr aylarına planlaşdırılıb. Buraxılışların ümumi həcmi təqribən 80-100 milyon manat təşkil edəcək".
T.Kazımov qeyd edib ki, bu günədək 180 milyon manatdan çox məbləğdə təqribən 20 buraxılış həyata keçirilib: "Nəzərə alsaq ki, bəzi kağızlar bağlanıb, hazırda dövriyyədə təqribən 122 milyon manat dəyərində 15-ə yaxın qiymətli kağız var".