Azərbaycan, Bakı, 25 avqust /Trend, müxbir Zülfiyyə Qurbanova/
2014-cü ilin yanvar-iyul aylarında Gürcüstanın ixracında Azərbaycanın payı 20,3 faiz təşkil edib. Trend-in məlumatına görə, bu barədə Gürcüstan Milli Statistika Xidmətinin bu ilin yanvar-iyul aylarının yekunları üzrıə xarici ticarət haqqında hesabatında deyilir.
Hesabatda bildirilir ki, 2014-cü ilin yanvar-iyul aylarında Gürcüstandan Azərbaycana 337,63 milyon dollarlıq məhsul ixrac olunub. Azərbaycana ixrac 2013-cü ilin analoji dövrü ilə müqayisədə 14,9 faiz azalıb. Müqayisə üçün: ötən ilin yanvar-iyun aylarında Azərbaycana 396,55 milyon dollar dəyərində Gürcüstan malları ixrac olunmuşdu.
Gürcüstandan Azərbaycana ixracın strukturunda əsas yeri minik avtomobilləri, iribuynuzlu mal-qara, tibbi avadanlıqlar, sement, polad armaturlar və digər məhsullar təşkil edir.
Hesabatda deyildiyi kimi, bu göstərici üzrə ikinci yeri Ermənistan tutur. İlin əvvəlindən bu ölkəyə 179,02 milyon dollar dəyərində (ixracın ümumi həcminin 10,8 faizi) Gürcüstan malları ixrac olunub.
Gürcüstan mallarının ixrac həcmi üzrə üçüncü yeri Rusiya tutur. 2014-cü ilin yanvar-iyul aylarında Gürcüstandan Rusiyaya 160,99 milyon dollar dəyərində (ixracın ümumi həcminin 9,7 faizi) məhsul ixrac olunub.
Bu ilin yanvar-iyul aylarında Gürcüstanla Azərbaycan arasında əmtəə dövriyyəsi 684,9 milyon dollar (Gürcüstanın xarici ticarət əməliyyatlarının ümumi həcminin 10,6 faizi) təşkil edib ki, bu da ötən ilin analoji dövrünün göstəricisindən 5 faiz azdır. Müqayisə üçün: 2013-cü ilin yanvar-iyul aylarında iki ölkə arasında əmtəə dövriyyəsi 721,2 milyon dollar olub.
