Azərbaycan, Bakı, 25 avqust /Trend, müxbir Zülfiyyə Qurbanova/
Gürcüstan 2014-cü ilin yanvar-iyul aylarında Azərbaycandan 347,28 milyon dollar dəyərində məhsul idxal edib. Trend-in məlumatına görə, bu barədə Gürcüstan Milli Statistika Xidmətinin 2014-cü ilin 7 ayının nəticələri üzrə xarici ticarət haqqında hesabatında bildirilir.
Hesabata əsasən, Azərbaycandan Gürcüstana idxalın həcmi il ərzində 6,97 faiz yüksəlib. Müqayisə üçün: 2013-cü ilin analoji dövründə Gürcüstan 324,66 milyon dollar məbləğində Azərbaycan məhsulu idxal edib.
Azərbaycan Gürcüstanın məhsul idxal etdiyi ölkələr siyahısında üçüncü yeri tutmaqda davam edir. Ölkəyə gətirilən malların ümumi həcmində Azərbaycan ixracının xüsusi çəkisi 7,2 faiz təşkil edir.
Gürcüstan daha çox Türkiyədən məhsul idxal edir. 2014-cü ilin ilk 7 ayında Gürcüstan Türkiyədən 968,4 milyon dollar dəyərində (və ya idxalın ümumi həcminin 20,1 faizi) məhsul idxal edib. Çin 420,68 milyon dollarla və ya Gürcüstan idxalının ümumi həcminin 8,7 faiz xüsusi çəkisi ilə ikinci yeri tutur.
Gürcüstan Azərbaycandan əsasən benzin, neft məhsulları, tikinti materialları, elektrik enerjisi, şüşə məmulatları, marqarin və s. idxal edir. Azərbaycan iyulda ilk dəfə olaraq marqarin ixracına başlayıb.
Cari ilin yanvar-iyul aylarında iki ölkə arasında əmtəə dövriyyəsi 684,3 milyon dollar (Gürcüstanın xarici ticarət əməliyyatlarının ümumi həcminin 10,6 faizi) olub ki, bu da ötən ilin analoji dövrünün göstəricisindən 5 faiz azdır. Müqayisə üçün: 2013-cü ilin yanvar-iyul aylarında əmtəə dövriyyəsi 721,2 milyon dollar təşkil edib.