Azərbaycan, Bakı, 5 sentyabr /Trend, müxbir Emil İsmayılov/
TRACECA (Avropa-Qafqaz-Asiya) nəqliyyat sahəsində beynəlxalq əməkdaşlıq proqramı çərçivəsində növbəti [sayca üçüncü] investisiya forumu 2015-ci ilin birinci rübündə keçiriləcək. Bu barədə cümə günü Trend-ə TRACECA-nın Azərbaycandan milli katibi Akif Mustafayev bildirib.
İnvestisiya forumunun keçirilməsində əsas məqsəd investorları TRACECA-nın iştirakçısı olan ölkələrdə reallaşdırılan layihələrdə iştiraka cəlb etməkdir.
A.Mustafayev deyib ki, forumun dəqiq tarixi və keçiriləcəyi yer hələlik müəyyən edilməyib, lakin ilkin məlumatlara görə, forum gələn ilin birinci rübündə Avropa şəhərlərindən birində keçiriləcək.
Onun sözlərinə görə, hazırda Azərbaycan tərəfi, daha dəqiq desək, Nəqliyyat, İqtisadiyyat və Sənaye nazirlikləri, Dövlət Gömrük Komitəsi forumda iştirakla bağlı təkliflər hazırlayırlar.
Əvvəllər (2011-2012-ci illər) Avropa İttifaqının (Aİ) dəstəyi ilə Brüsseldə TRACECA çərçivəsində iki investisiya forumu keçirilib ki, həmin tədbirlərdə iştirakçı ölkələr öz investisiya nəqliyyat layihələrini təqdim ediblər.
TRACECA Aİ və Şərqi Avropa, Cənubi Qafqaz və Mərkəzi Asiyada onun tərədaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda daimi katibliyi var.
TRACECA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Moldova, Rumıniya, Tacikistan, Türkmənistan, Türkiyə, Ukrayna, İran və Ermənistandır.