Sentyabrın 30-da "Hyatt Recency" mehmanxanasının "Quba" zalında Finlandiya-Azərbaycan I iqtisadi forumu keçiriləcək. Bu barədə Trend ə iqtisadi forumun təşkilatçısı olan Azərbaycan Sahibkarlar Konfederasiyasının (ASK) mətbuat xidmətindən xəbər verilib. Məlumatda tədbirin İqtisadi İnkişaf Nazirliyinin dəstəyi ilə təşkil olunacağı bildirilib.
"Tədbir Finlandiya prezidentinin Azərbaycana səfəri çərçivəsində təşkil olunacaq. Bu məqsədlə Helsinkidən Azərbaycana 60-dək iş adamı gələcək. Foruma Azərbaycan tərəfindən bir o qədər yerli sahibkarın qatılması planlaşdırılıb.
Forumun birinci hissəsində tərəflər öz potensial imkanları barədə ətraflı məlumatlarla çıxış edəcəklər. Növbəti hissədə isə konkret sahələr üzrə gələcək əməkdaşlığa maraq göstərən iş adamlarının ayrıca görüşləri təşkil olunacaq",- deyə məlumatda bildirilib.
İlkin olaraq iqtisadi forumun iki gün keçirilməsi planlaşdırılıb. Forum çərçivəsində finlandiyalı sahibkarların müəssisələrlə tanışlıq gəzintisi, eləcə də regionlara səfərləri də nəzərdə tutulur. Hazırda Azərbaycan tərəfindən foruma qatılacaq şirkətlərin siyahısı dəqiqləşdirilir.
