İyulun 31-də Salonikidə Qara dəniz Ticarət və İnkişaf Bankının İdarəetmə Şurası Azərbaycanın sədrliyi ilə növbədənkənar iclasını keçirəcək. Bu barədə Trend ə bankın Azərbaycandan direktoru Samir Şərifov məlumat verib.
Onun sözlərinə görə, iclasın keçirilməsində məqsəd bankın hazırki prezidenti, Türkiyənin nümayəndəsi Mustafa Gurzenin səlahiyyət müddətinin 2006-cı ilin yanvarında başa çatması ilə əlaqədar yeni dörd illik müddətə bankın prezidentinin seçilməsidir. "Bankın Nizamnaməsinə görə, altı ay ərzində yeni prezident seçilməlidir".
Onun sözlərinə görə, bu vəzifəyə ən real iddiaçılar bankfın ən böyük aksionerlərinin nümayəndələridir. "Bu bankda üç ən iri aksioner Türkiyə, Yunanıstan və Rusiyadır. Bankın Yunanıstan ərazisində yerləşdirilməsini nəzərə alsaq, fikirləşirəm ki, hələ üstəlik prezidentin də bu ölkədən seçilməsi Yunanıstan üçün həddən artıq üstünlük olar. Beləliklə, bu vəzifəyə iki iddiaçı qalır ki, onlar da bu barədə artıq rəsmən elan ediblər ", - deyə S.Şərifov bildirib.