"Quş qripi" ilə mübarizə üzrə layihənin hazırlanması üçün Dünya bankının (DB) kənd yerlərinin inkişafı üzrə baş mütəxəssisi Maurizio Guadagninin başçılıq etdiyi missiya Bakıdadır. DB-nin Bakı nümayəndəliyində Trend ə bildirilib ki, ayrıca layihə hazırlanır və maliyyələşdirilmə üçün DB-nin ikinci "Azərbaycanın institusional quruculuğuna texniki yardım" (IBTA-2) layihəsində qənaət olunmuş $5,14 mln. məbləğində vəsait yönəldiləcək. Hazırda IBTA-2 kreditinin yenidən strukturlaşdırılması ilə bağlı hüquqi məsələlər yerinə yetirilir.
DB nümayəndəliyində hesab etmirlər ki, layihənin hazırlanması və təsdiqinə çox vaxt tələb olunur. Böhran halları zamanı DB təcili və sadələşdirilmiş proseduralar təsdiq edib və bunlardan "quş qripi" ilə mübarizə üzrə layihənin bəyənilməsi üçün istifadə olunacaq. Layihənin hazırlanmasına 1,5-2 ay sərf olunacaq, layihənin təsdiq olunması prosesinin tezləşdirilməsi isə həm də Azərbaycan hökumətindən asılıdır.
Bankın missiyası martın 11-dək ölkədə olacaq. Missiya Azərbaycan Respublikasında "quş qripi"nin qarşısının alınması və bu sahədə bütün strukturların birgə fəaliyyətinin əlaqələndirilməsi üzrə Dövlət komissiyası ilə işləyir.