...

Azərbaycanın Hesablama Palatası və Küveytin Dövlət Audit Bürosu əməkdaşlığa dair saziş imzalayıb

Biznes və iqtisadiyyat xəbərləri Materials 13 Mart 2006 13:22 (UTC +04:00)

Azərbaycanın Hesablama Palatasının (AHP) nümayəndə heyətinin Küveytə səfəri zamanı bu ölkənin Dövlət Audit Bürosu (State Audit Bureau of Kuwait) ilə əməkdaşlığa dair saziş imzalanıb. Bu barədə Trend ə AHP-dan məlumat verilib. Sənədi AHP-nın rəhbəri Namiq Nəsrullayev və Audit Bürosunun prezidenti Barak Xalid Əl Mərzuk imzalayıb.

Sazişdə audit sahəsində müxtəlif istiqamətlər üzrə kadrların hazırlanması, kadrların metodoloji təminatı və auditin əməli olaraq həyata keçirilməsinə yardımın göstərilməsi nəzərdə tutulur.

Səfər zamanı Azərbaycan nümayəndə heyəti ştatında təxminən 600 nəfərin çalışdığı Büronun strukturu ilə tanış olub.

N.Nəsrullayevin audit strukturunun prezidentinin müavini Süleyman Əl Zahidlə görüşündə bir sıra sahələrin, xüsusilə neft gəlirlərinin auditi ilə bağlı məsələlər müzakirə olunub.

Küveyt nümayəndəsi qeyd edib ki, neft sahəsində audit diqqətlə aparılır.

Səfər zamanı Küveyt Parlamentinin iclasında iştirak etmiş Azərbaycan nümayəndə heyəti iclasın sonunda spiker Casim Məhəmməd Əl Hərafi tərəfindən qəbul edilib. Görüşdə Azərbaycanla Küveyt arasında əməkdaşlığın genişləndirilməsi ilə bağlı məsələlər müzakirə olunub, bu ölkələrin audit strukturları arasında imzalanmış sazişin əhəmiyyəti vurğulanıb.

Həmçinin, Küveytin baş naziri Şeyx Nasir Məhəmməd Əl-Sabahla da görüş keçirilib. Görüş zamanı baş nazir Azərbaycanın iqtisadi cəhətdən cəlbediciliyini vurğulayaraq, bu ölkə ilə ticari-iqtisadi əlaqələrin inkişafında Küveytin maraqlı olduğunu qeyd edib.

Xəbər lenti

Xəbər lenti