Baku Steel Company (BSC) Azərbaycanın daxili bazarında zavodun məhsullarına olan tələbatın artması ilə əlaqədar Rusiya və Türkmənistana məhsulların ixracını dayandırıb. Bu barədə Trend ə BSC-dən məlumat verilib.
"Hazırda biz məhsullarımızı BP layihələrinin çərçivəsində istifadə olunan Gürcüstana çox fəal ixrac edirik", - deyə şirkətdən məlumat verilib.
Şirkətdən bildirilib ki, BSC ölkə hökumətinin yardımı ilə əldə olunan metal xammalının çox böyük ehtiyatına malikdir. Yanvar ayında zavod xammal çatışmazlığı ilə əlaqədar öz fəaliyyətini dayandırmağa məcbur olmuşdu. Müəssisənin xammala olan gündəlik tələbatı 1000-1200 ton təşkil edir.
2006-cı ildə müəssisə istehsalın həcmini 25% artırmağı planlaşdırır.
Bu gün ölkənin ikinci ən iri vergiödəyicisi olan BSC-nin istehsal gücü ildə 350 min ton təşkil edir və şirkətin əməkdaşlarının sayı 2 min nəfərdən çoxdur.
