Aprelin 6-da Kənd Təsərrüfatı Nazirliyi yanında Dövlət Baytarlıq Xidmətinin zona laboratoriyasında quş qripinin diaqnostikası və profilaktikası üzrə treninq keçiriləcək. Bu barədə Trend ə strukturun mətbuat xidmətindən məlumat verilib. Saatlı, İmişli, Əli-Bayramlı, Hacıqabul və Neftçalanın baytarlıq idarələri və laboratoriyalarının əməkdaşları və mütəxəssisləri üçün treninqlər ABŞ Beynəlxalq İnkişaf Agentliyinin maliyyə dəstəyi ilə Kolumbiya universitetinin professoru Ceffri Forman tərəfindən təşkil olunacaq. Burada xəstəliyin yaranma tarixi, onun fəsadları, yayılması və insanların bu virusa yoluxması, profilaktik işlər, təhlükəsizlik qaydaları və xəstəliklə mübarizə üsulları ilə bağlı məsələlərin müzakirəsi nəzərdə tutulur.
Dövlət strukturundan bildirilib ki, analoji tədbir ilk dəfə Lənkərandakı baytarlıq laboratoriyasında Salyan, Biləsuvar, Masallı, Cəlilabad, Yardımlı, Lerik və Astara mütəxəssisləri üçün keçirilib.
