Bu gün Azərbaycan Beynəxalq Bankının baş ofisində bankın korporativ müştəriləri telekommunikasiya texnologiyaları sahəsində dünyanın ən qabaqcıl şirkətlərindən biri - CİSCO Systems şirkətinin prezidenti Con Çeymbersin başçılıq etdiyi nümayəndə heyəti ilə görüşüb.
Trend in verdiyi xəbərə görə, Beynəlxalq Bank CİSCO Systems şirkəti ilə uzunmüddətli işgüzar münasibətlərin olmasını nəzərdə tutaraq, görüşün təşəbbüskarı və təşkilatçısı qismində çıxış edib. ABB idarə heyətinin sədri Cahangir Hacıyevin sözlərinə görə, CİSCO texnologiyalarının ölkə iqtisadiyyatında tətbiqinin genişləndirilməsi qeyri-neft sektorunun inkişafına səbəb olacaq. Azərbaycan və Amerika şirkətləri rəhbərlərinin görüşünün əsas məqsədi işgüzar münasibətlərin qurulması, telekommunikasiya sahəsində sərmayələrin cəlb olunma imkanlarının və yeni texnologiyaların gözdən keçirilməsindən ibarətdir.
Görüşdə böyük milli şirkət və korporasiyaların rəhbərləri, dövlət qurumlarının başçıları iştirak ediblər.
Hazırda CİSCO Systems oxşar məhsulun qlobal bazarının 56%-nə nəzarət edir.
2006-cı ilin iyun ayındakı vəziyyətə görə şirkətin kapitallaşması 120 milyard ABŞ dollarına, 11 rəqibin ümumi kapitallaşması isə 52 milyard ABŞ dollarına çatıb.
Səfər çərçivəsində Cisco Systems şirkətinin başçısı Con Çeymbers (John T.Chambers) Azərbaycanın İqtisadi İnkişaf naziri Heydər Babayevlə də görüşüb. Görüşdə əməkdaşlığın inkişaf prespektivləri, bir sıra layihələrin reallaşması müzakirə olunub. Şirkət başçısı Azərbaycanda ofis açmaq fikrində olduğunu bildirib. Bu məqsədlə artıq işlər başa çatır və onun harada yerləşəcəyi müəyyən olunub.
