İyulda Agrolizing ASC Azərbaycan regionlarında 4 texniki servis açacaq. Bu barədə Trend ə Agrolizing-in lizinq layihələrinin inkişafı və regionlarla iş üzrə şöbə rəisi Bəşir Xəlilov xəbər verib.
Bu servislərdə kənd təsərrüfatı texnikası lizinq vasitəsilə icarəyə veriləcək, istehlakçılara texniki xidmət göstəriləcək.
Onun sözlərinə görə, baza filialları Siyəzən, Masallı, Hacıqabul və Ucarda açılacaq.
Dövlət qurumunun Azərbaycan regionlarında 43 filialı var. Bura ASC-nin Şəki, Şamaxı, İmişli, Cəlilabad, Xaçmaz, Yevlax, Gəncə və b. rayonlarda 6-dan çox əsas bazası daxildir.
"Çoxsaylı filialların açılmasına baxmayaraq, Baş ofis və Bakı bazasına dair məsələ indiyədək açıq qalıb. Müəssisə rəhbərliyi müvəqqəti olaraq Kənd Təsərrüfatı Nazirliyində yerləşib. Müvafiq dövlət strukturlarına dəfələrlə edilən müraciətlərə baxmayaraq, rəhbərliyin yerinin dəyişdirilməsi məsələsi hələ həll edilməyib", - deyə B.Xəlilov vurğulayıb.
