Nazirlər Kabineti Maliyyə Nazirliyinə Gürcüstanın Azərbaycana olan borcunun restrukturlaşdırılması haqqında sazişin tamamlanması işlərini tezləşdirməyi tapşırıb. Hökumət mənbələrindən Trend ə verilən məlumata görə, sazişin avqustun ortalarında İqtisadi Əməkdaşlıq üzrə Azərbaycan-Gürcüstan Hökumətlərərası Komissiyasının iclası çərçivəsində imzalanması planlaşdırılır. Əgər gömrük əməkdaşlığı haqqında hökumətlərarası saziş iclasın keçirilməsinədək başa çatarsa, onun imzalanması da istisna deyil.
Dövlət birinci sənədin imzalanması prosesini uzatmaq niyyətində deyil, çünki bununla borğun Azərbaycan öüdcəsinə daxil olması ləngiyir. Rəsmi Tbilisi sazişin imzalanmasından dərhal sonra Azərbaycana $2,7 mln. ödəməyə hazır olduğunu bildirib. Gürcüstan dəfələrlə Azərbaycana sənədin hazırlanması ilə bağlı prosedurları tezləşdirmək haqqında müraciət edib.
Ləngimənin səbəbləri əvvəl Gürcüstan hökumətindəki kadr dəyişikliklərilə bağlı idi, daha sonra isə Bakı iki ölkə arasında gömrük sazişinin imzalanması barədə prosedurların razılaşdrılmasını gözləyirdi. İndi isə Nazirlər Kabineti hesab edir ki, bu sənədləri bir-birilə əlaqələndirmək lazım deyil.
Maliyyə Nazirliyindən qeyd ediblər ki, borcun ödənilməsi qrafik əsasında pulla həyata keçiriləcək. Borcun ümumi məbləği $16 189 573. Yeni varianta əsasən, onun bir hissəsinin ( $3,239 mln.) ödənilməsi 2007-2021-ci illərdə həyata keçiriləcək. Dgər hissəsi ( $2,7 mln.) sazişin qüvvəyə mindiyi gündən ödənilməyə başlayacaq və 2006-cı ilin sonuna qədər başa çatdırılacaq. 3-cü hissəsinin ödənilməsi isə 2010-2025-ci illərdə olacaq. Faiz ildə 3%-ə bərabər olacaq. Bu borc 1992-1994-cü illərdə ticarət əməliyyatları nəticəsində yaranıb.
