Nazirlər Kabinetindən Trend ə verilən məlumata əsasən,Dünya Bankı Azərbaycan hökumətinə Ekologiya üzrə Dövlət Proqramının hazırlanması ilə bağlı təkliflər təqdim edib.
Bu istiqamətdə əməkdaşlıq perspektivləri Dünya Bankının Avropa və Mərkəzi Asiya ölkələrində İnfrastruktura Departamentinin direktoru Piter Tompsonun səfəri çərçivəsində müzakirə olunub.
Bank Azərbaycanın bu sahədəki qanunvericiliyinin yaxşılaşdırılması üçün ekspertlər göndərməyə, layihənin gerçəkləşdirilməsində birbaşa iştirak etməyə hazır olduğunu bildirib.
DB həmçinin neftlə çirkləndirilmiş torpaqların təmizlənməsi sahəsində Ekoloji İş üzrə Agentlik yaratmağı təklif edib. Bu qurum bir növ ANAMA tipində olacaq, lakin təmizləmə və rekultivasiya məsələlərilə məşğul olacaq.
Nazirlər Kabinetinin nümayəndələrinin fikrincə, bu iş uzun illər üçün nəzərdə tutulub. "İşlərin görülməsindən sonra təmizlənmiş ərazinin normaya uyğun olduğu barədə sertifikat verilməlidir. Bu sənəd təmizlənmiş torpağın yoxlanılmasından sonra veriləcək və torpaq sahibləri həmin yerlərdə kənd təsərrüfatı ilə məşğul ola biləcək" - deyə Nazirlər Kabinetindən qeyd ediblər.