Sentyabrdan Azərbaycan Milli Bankı yeni qaydalara müvafiq olaraq valyuta mübadilə məntəqələrinin açılışı ilə bağlı müraciətlər gözləyir. AMB idarə heyətinin baş direktoru Rüfət Aslanlının Trend ə bildirdiyinə görə, bu qaydalar iyulun sonunda qüvvəyə minib və yeni açılan bürolara tədbiq olunacaq. Hazırda fəaliyyət göstərən mübadilə məntəqələri isə köhnə qaydalara əsaslanır.
"Bu məntəqələrin əksəriyyətinin lisenziyasının etibarlıq müddəti 2006-cı ilin sentyabrında başa çatır. Həmin məntəqələr bundan sonra fəaliyyətini davam etdirmək istəsə, yeni qaydalara müvafiq olaraq təkrar qeydiyyatdan keçməlidir. Bizdə olan məlumata əsasən, bir çox banklar mübadilə məntəqələrinin statusunu dəyişdirməyə başlayıb. Biz hazırkı məntəqələrin fəaliyyət müddəti başa çatdıqda AMB-yə müraciət etməsini gözləyirik" - deyə R.Aslanlı vurğulayıb.
Hazırda ölkədə 281 mübadilə məntəqəsi fəaliyyət göstərir. Bunların sayı sentyabr valyuta böhranından əvvəl 620 idi.
Yeni qaydaların məğzi mübadilə məntəqələrinin statusunu bank şöbələri səviyyəsinə çatdırmaqdan ibarətdir. Qaydalar həmçinin mübadilə məntəqələri əməliyyatlarının bankların əməliyyat sisteminə inteqrasiyası mexanizminin və təhlükəsizlik texnikası üzrə tələblərin gücləndirilməsini, əməkdaşların peşəkar hazırlığına verlən tələblərin müəyyənləşdirilməsini nəzərdə tutur.