2007-ci ildə xaricdə təhsil alan azərbaycanlı tələbələr üçün təqaüdlərin təyinat formasına dəyişiklik edilməsi planlaşdırılır. Maliyyə Nazirliyinin sosial sahələrin maliyyələşdirilməsi şöbəsinin müdiri Xəqani Rzayevin Trend ə verdiyi məlumata görə, bu, əsasən Türkiyə, Rusiya və Ukraynada oxuyan tələbələrə şamil edilir.
Prezidentin bu yaxınlarda imzaladığı sərəncama görə, ölkədə təqaud fondunun yaradılması nəzərdə tutulur və 3 ay ərzində tələbələrin xaricdə təhsil alması üzrə xüsusi dövlət proqramı işlənib hazırlanacaq.
"Hazırda bu istiqamətdə böyük problemlər - pərakəndəlik mövcuddur. Biz uzun müddətdir ki, bu problemləri aradan qaldırmağa çalışırıq. Tələbələr isə məhz aydın olmayan meyarlarla xaricdə təhsil almaq üçün seçilir. Hesab edirik ki, onlar xüsusi sınaqdan keçməlidir. Bu da yəqin ki, dövlət proqramında öz əksini tapacaq. Bundan başqa, ixtisas və ali məktəb ölkənin əmək bazarının tələbatı çərçivəsində seçilməlidir", - deyə X.Rzayev qeyd edib.
Rusiyada və Ukraynada təhsil alan tələbələr üçün təqaüdün məbləği $100, Türkiyə və Misirdəki tələbələr üçün isə $50 səviyyəsindədir. Şöbə müdirinin sözlərinə görə, belə fərq dövlətlərarası sazişlərlə əlaqədardır. Həmin sazişlərə görə, ölkələr tələbə mübadiləsi apara bilər. Bundan başqa, bu ölkələr $50 məbləğində vəsaitlə təmin edir. Bu gün Ukraynada 14, Türkiyədə 750, Rusiyada 149 azərbaycanlı tələbə təhsil alır.