2006-cı ilin yanvar-sentyabr aylarında Naxçıvan Muxtar Respublikasında (NMR) ÜDM-in artım həcmi 2005-ci ilin analoji göstəricisi ilə müqayisədə 20,9% təşkil edib və ümumi dəyəri 278758 min manata çatıb. NMR-in Bakıdakı daimi nümayəndəliyindən Trend ə verilən məlumata görə, bu dövr ərzində ÜDM-in 47,9%-i və ya 133559,2 min manatı mal istehsalının payına düşür. Göstərilmiş xidmətlərə görə 134655,9 min manatlıq (48,3%) əlavə dəyər yaranıb. 3,8% və ya 10542,9 min manat isə məhsul və idxala qoyulan xalis verginin payına düşür.
Bundan başqa, sənayedə 13,8% (38524,6 min manat), kənd təsərrüfatında 21,2% (59093 min manat), tikintidə 12,9% (35941 min manat), nəqliyyatda 5,5% (15513,6 min manat), rabitədə 0,6% (1569 min manat), topdan və pərakəndə satışda, eləcə də avtomobil, müxtəlif məişət texnikasının təmirində 19,9% (55531,2 min manat), restoran və mehmanxanalarda xidmət sahəsində 0,5% (1294,9 min manat) və digər xidmətlərdə 21,8% (60747,2 min manat) əlavə dəyər yaranıb.
