Azərbaycan Dövlət Xəzər Dəniz Gəmiçiliyi Qara dəniz gəmiçiliyi ilə (Ukrayna) borcun qaytarılması məsələsi üzrə razılıq əldə edib. Borcun məbləği 480 min ABŞ dollarıdır. Trend xəbər verir ki, bu barədə Xəzər dəniz gəmiçiliyinin rəisi Aydın Bəşirov məlumat verib.
Onun sözlərinə görə, Qara dəniz hövzəsi gəmi sahiblərinin Beynəlxalq assosiasiyasının 10-cu toplantısı zamanı bu məsələ üzrə Qara dəniz gəmiçiliyinin başçısı Sergey Melaşenko ilə görüş keçirilib.
Razılaşmaya əsasən Ukrayna şirkəti borcu gəmilər üçün ehtiyat hissələrlə qaytaracaq. Xəzər dəniz gəmiçiliyinin Qara dəniz hövzəsində üzən gəmiləri Ukrayna limanlarına daxil olarkən ehtiyat hissələrlə təchiz ediləcəklər.