2007-ci ilin dövlət büdcəsində sosial yönümlü xərclərin xüsusi çəkisi 38 faiz və ya 2 milyard 163, 4 milyon manat proqnozlaşdırılır. Trend xəbər verir ki, bu barədə Maliyyə Nazirliyinin idarə rəisi Xəqani Rzayev bildirib.
X.Rzayev qeyd edib ki, 2006-cı illə müqayisədə bu proqnoz 691,3 milyon manat və ya 47 faiz çoxdur. Nazirliyin rəsmisi onu da bildirib ki, büdcədən maliyyələşən təşkilatlarda çalışan insanların əmək haqlarının mərhələli şəkildə artırılması 2007-ci ilin dövlət büdcəsində də nəzərdə tutulub: "İctimai təşkilatlara dövlət büdcəsindən subsidiyalar ödənilir. Həmin subsidiyaların həcminin əvvəlki illərdə olduğu kimi 2007-ci ilin büdcə layihəsində də artımı nəzərdə tutulur". Nazirliyin rəsmisi bunu ölkədə minumum əmək haqlarının artırılması müqabilində həmin vəsaitləri ictimai təşkilatların işçilərinin sosial müdafiəsi tədbirlərinə yönəltmələri üçün edildiyini bildirib.
X.Rzayev onu da söyləyib ki, əməyin ödəniş sistemi vahid tarif cədvəli ilə tənzimləndiyindən dövlət büdcəsindən maliyyələşən təşkilatlarda vəzifə maaşlarının bu ilin sonuna qədər birmərhələdə artımı gözlənilir. Nazirliyin rəsmisi 2007-ci ilin dövlət büdcəsində ölkədə yaşayış minimum həddinin müəyyənləşdirilməsi ilə bağlı da materialların təqdim olunduğunu bildirib. Qeyd edib ki, 2006-cı ilin büdcəsi təsdiqlənərkən yaşayış minimumunun səviyyəsi də təsdiqlənəcək: "Bununla yanaşı ayrı-ayrı sosial demoqrafik quruplara dövlət tərfindən verilən müavinətlərin də yaşayış minimuma yaxınlaşdırılması istiqamətində tədbirlər həyata keçiriləcək".