Respublika üzrə daşınmaz əmlakın qeydiyyatı və kadastrın yaradılması layihəsi üzrə Dünya Bankının missiyası öz işini uğurla başa çatdırıb. DB-nin Cənubi Qafqaz üzrə aparıcı iqtisadçısı Kristian Pitersenə istinadən Trend xəbər verir ki, səfər çərçivəsində gələcəkdə Direktorlar Şurasına təqdim olunmaqla 2007-ci il fevral-mart aylarında layihənin kredit razılaşması ilə bağlı danışıqların aparılması barədə razılıq əldə edilib.
K.Pitersenin sözlərinə görə, layihənin əsas məqsədi daşınmaz əmlakın qediyyatı sisteminin təkmilləşdirilməsi və kompyuterləşdirilməsidir ki, bu, bu gün 20 günə aparılan qeydiyyatı 1 günə qədər azaldacaq. Eyni zamanda, qeydiyyat xidməti ofislərinin modernləşdirilməsi, Dövlət Əmlakı İdarəsi üzrə Dövlət Komitəsində dövlət əmlakını idarə sistemini müasir səviyyədə təkmilləşdirməsi nəzərdə tutulur. Respublika üzrə müqayisə aparmaq üçün kadastr və aerofotoqrafiya xəritəsinin hazırlanması planlaşdırılır, sonra məlumatlar elektoron məlumatlar bazasına yerləşdiriləcək.
Layihənin benefisiarları qismində Nazirlər Kabineti yanında Daşınmaz əmlakın reyestri dövlət xidməti, Torpaq və Kartoqrafiya üzrə Dövlət Komitəsi, Dövlət Əmlakı üzrə Dövlət Komitəsi və Ədliyyə Nazirliyi müəyyən edilib.
Layihənin təxmini dəyəri 40 mln. dollar təşkil edir, bunun 30 mln. dolları DB-nin payına düşür. Layihənin rəhbəri Qeyvin Adlinqtonun (bankda torpaq inzibatçılığı üzrə mütəxəssis) başçılıq etdiyi DB-nin missiyası dekabrın 13-də işini başa vurub.